તું, તારો સાથ, તારો સહવાસ

૧

ઢબૂરી દેતી ટાઢ અને
રેલાઇ રહેલા અંધકાર વચ્ચે
ચાંદની પ્રસરાવતો ચંદ્ર
જાણે
મારા અંધિયારા જીવનમાં
પ્રકાશ અને હૂંફ આપતો સૂર્ય
એટલે
તું.


૨.

ભર વરસાદે પલળવાથી બચવા
એક છાપરા નીચે લીધેલ આશરો
અને
મારા જીવનની તડકી-છાંયડી વચ્ચે
તારા ખભા પર માથુ ઢાળી દેતાંક ને
મળેલ વિસામો
એટલે
તારો સાથ.

૩.

એક અજાણ જંગલમાં
રાહ ભુલેલા પ્રવાસીને
અચાનક મળી આવેલ ભોમિયો
અને
મારા ખભે ખભા મિલાવી
મારા દુ:ખ સુખમાં સહભાગી થવા
ઇશ્વરે લંબાવેલ હાથ
એટલે
તારો સહવાસ.

વર્તુળ

હું
એક એવા વર્તુળના
કેન્દ્ર પર ઊભો છું
જેની ત્રિજ્યા
તારી અને મારી વચ્ચેના અંતર કરતાં
ઓછી છે.

તું
એક એવા વર્તુળના
કેન્દ્ર પર ઊભી છે
જે
મારા વર્તુળને ક્યાંય છેદતું નથી,
છતાં
આપણે બંને વર્તુળો છીએ,
સરખા લક્ષણો ધરાવતા
સંપૂર્ણ ભૌમિતિક આકારો,
જેને
કેન્દ્ર અને પરિઘ સિવાય
પોતાનું કશું નથી.

મારી આસપાસ હો ...

તું દૂર હો કે પાસ હો
પણ મારી આસપાસ હો

મારો ફોટો જોઊં ત્યાં
તારો મને આભાસ હો

ડાયરીના પાના વચાળે
દબાવેલ સુવાસ હો

હથેળીયું માં શ્વાસ હો
ટેરવા પર આશ હો

તું ભલે રહી બધે
ક્યાં મારી આસપાસ છો ?